Helgi Helgason
			Helgi Helgason var fæddur í Reykjavík 23. janúar 1848. Var hann bróðir Jónasar Helgasonar. Helgi var mjög fjölhæfur, lærði trésmíðar og hafði smíðað sér fiðlu um fermingaraldur. Hann unni sönglist og fögrum tónum og 1875 fór hann til Kaumannahafnar til að læra lúðraleik, en við konungskomuna til Íslands 1874 hafði hann hlýtt á lúðrasveit konungs og vildi stofna slíka sveit. Í Kaupmannahöfn lærði hann á horn og fiðlu, auk þess sem hann lærði harmóníum- og orgelbyggingu. Er hann kom heim frá námi stofnaði hann “Lúðraþeytarafélag Reykjavíkur” og átti það sér langa og merka sögu. Hann fór aftur til náms, nú í tónfræðum, 1880. Hann hafði þá samið nokkur lög sem hann útsetti fyrir hornaflokkinn, en lögum hans fjölgaði ört eftir að hann kom frá því námi. Þau birtust í vikublöðum eða voru sérprentuð og 1892 kom út “Íslensk sönglög”. 1902 fluttist Helgi til sonar síns Sigurðar tónskálds í Ameríku. Dvaldi hann þar allmörg ár og fékkst meðal annars við tónlistarstörf. Ekki undi hann þó vel þar vestra, snéri hann aftur til Íslands nokkur árum fyrir andlát sitt, en hann lést í desember, 1922.
		Steingrímur Thorsteinsson / Þorsteinn Gíslason Vorsöngur / Hannes Hafstein Söknuður (Svanfleyga sál) / Steingrímur Thorsteinsson